Search

Translate

الاثنين، 3 يوليو، 2017

مشكلة عضوة !!!



كنا بنتكلم كتير عن تاثير صفحات التواصل الاجتماعي علي المجتمع ككل و علي الفرد كشخص و ان اثاره السلبيه للاسف الشديد بقت اكتير بكنير من اي ايجابيات بيقدمها .. انهارده هنتكلم علي ال groups &pages المتخصصة في عرض المشاكل :


المشهد الاول : جروب للدكاتره البنات .. هدفه الرئيسي ليس عرض اي مشاكل لكن مفيش فايده تم اقتحام الجروب بمشاكل من عينه - بدون ذكر الاسم يا دكتورة - .. طبييه شابه عرضت مشكلتها و انها كانت بتعاني بطفوله قاسيه مع اهلها و ان بعد موقف معين ما حاولت تنتحر مرتين و بتسال تعمل ايه لان حالتها سيئة و كانت النصائح - اللي المفروض من دكاتره لكن طبعا كل اللي نصح نصح بقلب الست و ليس بعين طبيب - كانت كالتالي قربي من ربنا ، اشتري لبس جديد ، ما يهميكش و لا تحطي في بالك ...طيب البنت دي انهارده اتبلغنا انها وجدت منتحره علي سجاده الصلاه و كانت لابسه لبس جديد ذي ما اتنصحت !!! لان بكل بساطة البنت مريضة اكتئاب ربنا يرحمها و بكل بساطه كانت المفروض تتعرض لطبيب نفسي مش تتعرض علي الsocial media



المشهد الثاني : واحده بتعرض مشكلتها بتاعتها فيبيتها .. و اي كانت المشاكل بيكون دائما الرد كالتالي : اطلقي و لو مخطوبة افسخي ، او اسمعي كلام جوزك عيب عليكي ، او اسمعي كلام اهلك ملكيش غيرهم ، او شغلك و قرشك و بس.. و هلما من النصايح اللي تودي في ستين داهية ... لكم ان تتخليوا ان علي نفس المشكلة كم من الردود المتاقضه في الثاية الواحده .. و ده طبيعي لان ببساطه كل واحد اتربي تربيه مختلفة عن التاني .. من background و ثقافة بيت مختلفة و اللي انتي تقبلية غيرك ما يقلبهوش و العكس ... يبقي من الاساس الsocial media مش هتدي حل غير انك هتنقي اللي يجي ع هواكي و الاسم بس انك مخترتيش .. عندك مشكله في بيتك مكانها في بيتك اولا ثم couple counseling او كبير عيله او شيخ مسجد whatever ثقافتكم ايه



المشهد الثالث : واحده حياتها ذي الفل و داخله تعمل فيلم ع الناس و تقول كلام وحش عشان بتقي الناس تتعقد و يعيشوا في نكد ... في بيوت اتخربت بسببكم و لما نشوف هتقفوا قدام ربنا تقولوا ايه علي البيوت اللي في حزن و نكد عشان انتم مرضي و لازم تتعالجوا



الخلاصة : 1- مشاكلك مش مكانها التواصل الاجتماعي .. ليها اماكنها اللي ذكرناها 2- حاولوا و انتوا بتحلوا مشاكلكم حقيقي تحلوا و تعمروا بيت مش تخربوا 3- اللي بتنصح حد اعرفي ان الحرف اللي بتكتبيه بيفرق مش اعمار بيت بس اهو في حياه انسان - اهي بنت ماتت اهي - كل حرف بتكتبه هتتسالي قدام ربنا عليه .. لو حطينا ربنا قبل ما نكتب حاجه اشك اننا هنكتب اصلا 4- اللي مستمتعه بقي بالقراءه بتاعت المشاكل البؤس دي و تدخل و النبي حطوني ع جروب المشاكل .. انا بقولك هيجيلك اكتئاب ..مودك هيبقي وحش .. هتبقي انسانه شكاكة ...معملتك مع جوزك و ولادك و اهلك و اصحابك هتتغير غصبن عنك.. قدامنا في بيوت اتخربت بسبب اوهام ال social media



الخلاصه #اتقوا_الله في نفسكم

اتقوا الله في الناس

ليست هناك تعليقات:

إرسال تعليق

لا تبخل علينا برأيك