حد عايز يعرف مين الصالح فى البلد فعلا ،مين اللى بيحب البلد بجد ،اكيد ؟!
الاجابة ان كلنا طبعا بنجب البلد و كلنا خايفين عليها بس كالعاده كل واحد و بطريقته و باختلاف اسلوبه و بوجهة نظره.
و مع اختلاف وجهات النظر ، تتولد المشاكل ، و ان جينا للحق فى مصر- و للمصريين حصريا- مفيش حاجة اسمها " الاختلاف فى الرأى لا يفسد للود قضية " الا للقليل منا ، الاختلاف فى الرأى فى مصر بيفسد الود و الاخوة كمان و مش بيعمل بس قضية ده بيعمل قضايا لمجلس الدوله و نهايك عن المشاكل و الفضائح على الفضائيات اللى مش عايزة حاجة غير تسخن عشان الاعلانات تكتر و الفلوس تجرى فى ايدهم و الخ من المصالح الاخرى ، و لو وجدت اتنين غير متفقين فى حوار هيقلب و يبقى شجار و مش بعيد يتحول لمظاهرة.
و تختلف وجهات نظرنا باختلاف مصالحنا و كل واحد بيحب مصر بالطريقة اللى تخدم مصلحته حتى لو كانت الهدف نبيل و سامى لكن فى النهايه هى مصلحته و ده طبيعى فى النفس البشرية مفيهاش اى حاجة .
و باختلاف المصالح تختلف الاساليب التى يمكن ان تستخدمها لوصول لهذه المصلحة ، و اذا عددت كم القوى فى مصر و مصالح كل واحد مش هخلص و مش هكون عادله لو ذكرت ناس دون ناس بس اللى اقدر اقوله ان لو عايزين تعرفوا مين الصالح بجد فى البلد دى انزل اى شارع فى مصر هتلاقى الصالح اللى بجد .
الصالح اللى بجد هو المواطن البسيط الغلبان اللى كل مصلحته ان يلاقى لقمه كويسة حلال له هو و عياله و كل طلباته انه يلاقلهم تعليم كويس و اربع حيطان تداريهم و علاج كويس لو حد منهم تعب و كل احلامه انه يطمن على مستقبل عياله ، المواطن البسيط الغلبان اللى نفسه يعيش مرتاح و بكرامه و المواطن اللى المفروض شباب التحرير طلعوا عشانه.
هو نفس المواطن اللى من بعد 25 يناير محدش حس بالضرر غيره و اللى محدش بالكساد الااقتصادى و رزقه اللى بقى بيقل يوم بعد يوم ، المواطن الوحيد اللى كل جنيه بيطلع من جيبة بيفكر انه هيأثر قد ايه على اهل بيته ، اللى كل مظاهرة مهما كان هدفها نبيل و اللى لازم تقلب كل مره بمصيبة محدش بيحس بالمصيبة دى غيره.
ياريت نفكر فى مصلحة هذا المواطن الاول بعد كده كل واحد يعمل اللى قلبه و عقله يدله عليه .. عارفة انى هتهاجم بس ده رأئي و باذن الله هدافع عنه.
( تمت بحمد الله )
جميع الحقوق محفوظة
جميع الحقوق محفوظة
كلامك صح في ان المواطن الغلبان هوا اللي صالح .. بس هل ده معناه ان كل القوى السياسية بتاعة مصالح ؟؟ لو ده صحيح ازاي ممكن ننتخب في مجلس الشعب والرئاسة من بعده ؟؟ حاجة كمان .. اللمواطن المصري الغلبان غالبا بيكون جاهل بحاجات كتيير بتحدث في المطابخ السياسية ودايما رأيه بيكون عاطفي اكثر منه عقلاني وبياخد الامور من ع الوش بس ( ممكن يكون ده بسبب طيبته) بس انا شايفة ان ده عيب فيه ونقطة ضعف لا تصلح لبناء دولة قوية واعية
ردحذفللتعليق رقم واحد
ردحذفاوافقك الراى .. بس لو كان المواطن الغلبان ذو نقاط ضعف و لا يصلح لبناء دوله ليه بقى بيتأخد رايه فى استفتاء و لا انتخابات ؟ ليه احنا دائما متصورين ان مدام اقل منى فى مستوى فكرى معين يبقى انا ليا حقوق اكتر منه و ان صوتى اعلى من صوته و ساعتها نبقى ذى النظام القديم اللى كانوا شايفيين ان المواطن المصرى ملوش لزمه و هما بيتصرفولنا
انا مقولتش كدا انا قولت ان دي مشكلة في المواطن المصري .. بس مش معنى كدا ان الناس الاعلى منه تأخذ حقه وتقف فوقه . انا كان قصدي ان الجهل الذي يسود ممكن يكون سبب لسوء الاختيار والحكم . ويمكن الجهل ده هيكون السبب ان يتولد نظام غير عادل من جديد بس المرة دي هيكون اتولد على ايدينا
ردحذفالى التعليق رقم 3
ردحذفيبقى لو مشكلتنا الجهل يبقى لازم نثقف الناس و نوعيها و نمحو اميتهم بمشاريع تنمويه و انسانية
و نحاسب كل اللى اللى بيستغل جهل الناس لحسابه